BAGUIO CITY – Inaprubaran ti lokal a konseho ti Baguio City iti umuna a panakaibasana ti singasing nga ordinansa a mangipangpangato iti entrance fees iti Botanical Garden, maysa a pagpasyaran iti siyudad.
Iti agdama, ti entrance fee para kadagiti ubbing ket P5 bayat a ti entrance fee kadagiti adults ket P10 kas nailanad iti Section 31-C ti Environment Code of Baguio City (Ordinance 18-2016).
Nupay kasta, naisingasing iti baro nga ordinansa ti panakaipangato ti entrance fee iti P150 para kadagiti turista, P50 kadagiti residente ti Baguio nga agtawen iti sangapulo ket tallo nga agpangato ken P30 kadagiti residente ti Baguio nga agtawen iti sangapulo ket dua nga agpababa.
Maipaay ti 20% discount kadagiti senior citizens ken estudyante nu adda ti maiparang dagitoy nga identification cards.
Nailawlawag a ti makolektar nga entrance fee iti Botanical Garden ket mailatang iti annual budget ti Environment Parks and Management Office (CEPMO) ken maaramat iti environmental programs ken project a mangsustinir ken mangmintinar iti kinadalus ken kinapintas dagiti parke iti siyudad.
Ti nasao nga ordinansa ket insingasing ni Councilor Lilia Farinas kas panagrespondena iti kiddaw ni Atty. Rhenan Diwas, dadaulo ti CEMPO.
Padaanan ti benneg dagiti maseknan nga opisyales ti Baguio City seknan iti daytoy.
