Maisingsingasing ti panakaipangato iti masingir a garbage disposal fee iti singkwenta a piso tunggal bulan manipod iti trenta a piso a masingsingir iti agdama.
Iti panakiuman ti Bombo Radyo kenni Baguio City Councilor Rocky Aliping, manarimaan paylaeng ti panakaadal ti nasao a probisyon ken nu kasano a depensaranda daytoy apaman a tingitingin ti lokal a gobyerno iti siudad.
Kagiddan dayta,mangmanmana ni Councilor Aliping a maisumitir iti maseknan nga opisina ti nasao a probisyon ita metlaeng a bulan babaen iti rekomendasyon iti General Services Office ken ti Committee on Barangay Affairs.
Tarigagay metlaeng daytoy a baliwan ti 70:30 ratio iti panakabingay dagiti makolektar a garbage disposal fee.
Mangnamnama ni Aliping nga agbalinen a dakdakkel ti porciento a maipaay iti barangay a dumanon iti 70% ken 30% laengin ti bingay ti siudad.
Iti agdama, dakdakkel paylaeng a porciento ti maipapaay iti siudad ngem iti barangay iti kapada metlaeng a ratio.//Bombo Rob Dominguez
