BAGUIO CITY- Panggep ti Department of Education –Cordillera ti panakaingato ti maipapaay nga insentibo kadagiti atleta a makaawat iti medalya iti maisaysayangkat nga sporting event ti ahensia.
Sigun kenni Georaloy Palao-ay, panakangiwat ti Dep-Ed-Cordillera, ad-adalen ita ti ahensya ti nasao a banag tapno manayunan pay ti premyo para iti sakripisyo dagiti athleta.
Kinunana a malaksid iti kanayunan nga insentibo, panggep pay dagitoy a papintasen dagiti sports program nangruna kadagiti parapubliko a pagadalan kas iti panakaisayangkat ti seminars ken training kadagiti atleta ken dagiti coaches.
Innayonna a gapu kadagiti maisaysayangkat a nagduduma nga sports activity ket naguyugoy metlaeng dagiti nagduduma nga Local Government Units (LGUs) a tutukan dagiti programa dagitoy iti tay-ak ti sports a dakkel a makatulong kadagiti athleta a mang-develop pay ti interest dagitoy iti ay-ayam.
Impannakelna met a ti napintas a performace ti Team Cordillera iti kaleppas a Palarong Pambansa ket mangipakita iti napapintas pay nga sports program ti Dep-ed ken ti panakibinnadang dagiti LGU iti rehion.
