BAGUIO CITY – Manamnama a maipangato ti minimum a sweldo dagiti mangmangged iti rehiyon Cordillera.
Sigun kenni Atty. Marvie Fulgencio manipud iti Regional Tripartite Wages and Productivity Board – Cordillera, adalenda pay dagiti posibilidad, addang ken rason iti nasao a panggep.
Kinunana a kasapulan ti taripnong ken konsultasyon tapno ipakaamo iti publiko ti nasao a banag ken tunggal probinsya ket nasken a maipaayan iti patas a panakaipangato ti minimum wage.
Innayonna a kalpasan iti konsultasyon ket ipakaamoda ti resulta kalpasan ti 15 nga aldaw tapnu maipaayan gundaway dagiti nagduduma a sektor ken ti RTWPB a mangadal iti resulta ti konsultasyon.
Sigun pay kenkuana, posible a ti basic pay wenno ti cost of living allowance ti maipangato ngem depende iti mapagsaritaan wenno konsultasyon.
Maipalagip a naudi a naipangato ti sweldo dagiti minimum wage earners iti rehiyon idi napalabas a tawen ken ditoy a nagbalin a P320 ti innaldaw a minimum pay manipud iti sigud a P285 agingga P300 ditoy Baguio City ken Benguet.