BAGUIO CITY – Inkari ni incoming Executive Secretary to the Mayor Benjamin Macadangdang ti panakaipangrunana dagiti pakaseknan dagiti babbarangay ti Baguio iti kanito nga agtugaw daytoy iti pwesto.
Iti panakiyuman ti Bombo Radyo, kinunana a tutukana dagiti kangrunaan a parikot a mapaspasaran dagiti babbarangay ti Baguio kas iti kinakurang ti suporta a maipapaay iti implementasyon ti anti-road obstruction order.
Ipaayana metlaeng iti atensiyon ti isyu ti basura, operasyon ti iligal a droga, kinakurang ti bilang dagiti barangay tanod a mangbantay iti siguridad ti linak ken kappia iti tunggal barangay ken dadduma pay.
Dinakamat ni Macadangdang a daytoy ti mangirangtay iti lokal a gobierno ken dagiti babbarangay tapno matutukan dagiti parikut a sangsangwen ti tunggal barangay ti siudad.
Inlawlawagna a ti panagbalinna a representive ti mayor kadagiti barangay affairs ket saan a redundant iti panagserbi ni Community Affairs Officer Noel Mabutas.
Innayonna a nasayaat a wagas daytoy ti gobyerno tapno mapatibker pay ti maipaay nga aksion kadagiti parikut dagiti babbarangay ti siudad babaen it panagtinulongda kenni Mabutas.
