BAGUIO CITY – Nagsurat ni Itogon Mayor Victorio Palangdan kenni Environment Secretary Roy Cimatu seknan iti saan pay a panakairikep dagiti small scale mines iti masakupanna a munisipyo.
Iti panakiyuman ti Bombo Radyo kenkuana, kinunana a kalpasan nga imparikep wenno dinadael ti National Task Force on Mining Challenge ti 18 nga iligal a pagminasan iti paset ti Kias iti siudad ti Baguio ket naituding a sumaruno iti Itogon.
Nupay kasta, nagsurat daytoy kenni Cimatu para iti saan a panakaituloy ti plano.
Inlanadna iti surat a nasken nga adda pay ti maisayangkat a technical conference sakbay a maimplementar ti panakaiparikep dagiti iligal nga small scale mines iti Itogon.
Dinakamat ni Palangdan nga impalawagna iti suratna a saan nga amin nga small scale miners iti munisipyo ket iresponsable gaputa adda met dagiti responsable a minero.
Inaklonna met a saanna pay nga ammo no kaano a maangay ti taripnongda a kiddawna kenni Cimatu, kadua dagiti dadduma a mangbukbukel iti task force kas iti DENR, CIDG, NBI, BIR, PNP ken AFP.
Kagiddan iti daytoy, imballaag ti mayor a no saan a talaga nga agtungpal dagiti minero iti umno ken responsable a panagminas ket maiparikep ti usok dagitoy.
