BAGUIO CITY — Supsuportaran ni Presidente Rodrigo Duterte ti panakasuspindir ti amin nga small-scale mining operation iti intero a Cordillera Region.
Impeksa ti presidente ti nasao a takderna kasuruno ti panangipaulog ni Environment Secretary Roy Cimatu iti ‘cease and desist order’ kontra iti panagminas iti Cordillera gapu iti napasaran nga insidente dagiti landslide sadiay Itogon, Benguet a nagresulta iti ipupusay ti adu a tattao kabayatan ti panagdalapos ti Bagyo nga Ompong.
Iti panagturong ni Presidente Duterte sadiay Benguet Provincial Capitol, kinunana a saanen a makontrol ti operasyon ti panagminas iti pagillian a maysa kadagiti kangrunaan a pagsapulan iti probinsia ti Benguet.
Kinunana a mas nadagdagsen ti ipapaay a peggad ti panagminas iti komunidad no idilig iti kontribusyon daytoy iti ekonomiya ti pagillian.
Gapu iti daytoy, impetteng ti presidente a panawenen tapnu seryosuen ti gobierno ti panakipatungpal dagiti linteg babaen ti Department of Environment and Natural Resources kas iti panakaipawil ti open pit mining ken drilling ken ti nainget a panakasukimat dagiti amin a mining applications iti pagillian.
