BAGUIO CITY – Imbilin ti ama ti Baguio ti nainget a panangwanawan ni outgoing Baguio City Police Office (BCPO) City Director PCol. Allen Rae Co kadagiti operasyon ti ‘drop ball’ ditoy siudad.
Imbilin pay ni Mayor Benjamin Magalong ti panagaramid iti aksion ni PCol. Co tapnu maipasardeng dagiti operasyon ti nasao a sugal.
Kasaruno daytoy ti panakaiyuman kenkuana ti uppat a disso ditoy siudad a pakaisaysayangkatan ti drop ball.
Dinakamatna a mai-gidgiddan ti operasyon ti drop-ball kadagiti bingo social activities nga immunan a kiniddaw dagiti barangay para iti fund-raising campaign dagitoy.
Kabayatanna, imbinglay ni Mayor Magalong a makitkitada nga adda ti napintas a pagbanbanagan ti panangipatungpal dagiti sumagmamano a barangay iti bingo social activities.
Kinunana a nakatulong ti aktibidad iti pananggatang dagiti barangay iti computers ken dadduma pay a pasilidad para iti panakapasayaat ti barangay dagitoy.
