BAGUIO CITY–Posible a marugianen iti kabiitan a panawen ti pannakaipasdek ti rellocation site sadiay Longlong, La Trinidad, Benguet para kadagiti sigud a nagdappat iti BIBAK Area ditoy siudad ti Baguio.
Sigun ken ni Engr. Emerson Tabernero, zoning administrator ti La Trinidad, maur-uray laengen ti panagala ti Social Housing Finance Corporation iti development permit para iti lote a ginatang ti korporasion.
Ginatang ti korporasion iti P23-million ti lote a pagakaran dagiti apektado a residente nga ita ket maaw-awagan a Montañosa Mushroom Urban Poor Association.
Maibasar iti katulagan ti korporasion ken ti asosasion, masapul nga umutang iti sag-P400,000 ti tunggal pamilia nga umakar iti rellocation site.
Immunan a napagbalin kas residential area ti lugar ken maur-uray laengen ti development permit tapno marugian ti konstraksion kadagit agbalin a balay dagiti sigud nga informal settlers ti BIBAK Area ditoy siudad ti Baguio.
