BAGUIO CITY – Imbilinen ti dadaulo ti Police Regional Office Cordillera (PROCOR) ti panakaipasidong iti background check dagiti amin a makakanigid wenno militante a grupo iti rehion Cordillera.
Sigun kenni Police Brig. Gen. R’win Pagkalinawan, kangrunaan a sukimatenda ti kaadda ti legal a papeles a basaran ti operasyon dagiti nasao a grupo.
Kinunana a kitaenda no dagitoy a grupo ket nakarehistro iti Securities and Exchange Commission ken no agbaybayadda iti buis.
Impanamnamana a no maduktalan nga awanan iti kaskenan a dokumento dagiti nasao a grupo ket ipilaanda iti kaso dagitoy tapnu iti kortedan nga agsango.
Dinakamatna a nasken a saan a maaramat dagiti nasao a grupo iti panagur-or ti kwarta manipud kadagiti international organizations a mangsupsuportar iti komunista ken rebelde a grupo a mangraraut met kadagiti nagduduma a kompanya ti minas ken telecommunications ditoy rehion.
Innayon ni Gen. Pagkalinawan na iti Baguio City ket 25 nga organisasyon ti nabigbigda a maipasidong iti background check.
Sigun pay kenkuana, ipakpakita dagiti pulis iti rehion ti panagbalinda a public servant a mangipaspasigurado iti linak ken kappia, saan ket a dagiti makakanigid a grupo wenno dagiti rebelde.
