BAGUIO CITY – Imbilin ti mayor ti Baguio ti panakaipasidong iti boluntaryo nga emission testing dagiti pribado ken parapubliko a lugan ditoy siudad babaen iti Roadside Inspection Testing and Monitoring Team (RITMT).
Nailanad iti Executive Order No. 70, series of 2021 ni Mayor Benjamin Magalong a maisayangkat ti emission testing kabayatan ti regular working days ken adda mabayadan a P100 iti City Treasurer’s Office.
Kinunana a maipalubos ti nagsaruno a dua a boluntaryo a panagpa-emission test ngem no bumagsak ti lugan iti maikadua nga emission test ket nasken nga agbayad manen ti maseknan iti voluntary testing fee a P100 para iti operational expenses kas iti thermal paper ken dadduma pay.
Maipaayan iti Voluntary Vehicle Emission Certificate dagiti lugan a makapasa iti vehicle emission standards, no sadino, agpaut ti sertipikasyon iti dua a bulan.
Mabalin nga iparang ti nasao a sertipikasyon no mapara ti lugan gapu iti maatap nga smoke emission ngem saan a kaipapananna ti panakailaksidda iti roadside emission testing.
Maipaayan iti pito a seven calendar days dagiti maballaagan a drivers tapnu mangisayangkat ti kasapulan a panagtarimaan iti luganda tapnu makatulnog iti vehicle emission standards.
Maipaayan pay iti Traffic Citation Tickets dagiti lugan a mapaay iti roadside testing operations.
