Saan nga inaprubaran iti Baguio City Council ti naisingasing a panakaipatungpal iti trade fair idiay Burnham Park kagiddan ti panakarambak iti Pride Month ita nga Hunyo.
Maibasar iti proposal nga insumitir dagiti fest directors, June 10 agingga June 29 ti panggep dagitoy a panangipatungpal iti trade fair partikular idiay Lake Drive ken Rose Garden, Burnham Park.
Nupay kasta, iti naipatungpal a City Council Session itay laeng nabiit, inlawlawag ni Vice Mayor Faustino Olowan a maipalubos dagiti daduma nga aktibidad nga ipatungpal dagiti organizers malaksid iti panaglako wenno trade fair kadagiti nadakamat a paset iti parke.
Maipalagip a nagtuluy-tuloy ti panakaipatungpal iti trade fair idiay Burnham Park kadagiti napalpalabas a bulan partikular idi narambakan ti Panagbenga Festival idi February,SineMusiKain iti Montañosa Film Festival idi March 10 agingga April 6, International Food and Craft Expo idi April 8 agingga May 7, ken daduma pay a pasken.//Bombo Genzel Depayso
