BAGUIO CITY – Nagresulta iti nangato a positivity rate ti naisayangkat a tallo nga aldaw nga aggressive community testing iti siudad ti Baguio itay laeng nabiit.
Sigun kenni City Health Services Officer Dr. Rowena Galpo, nasurok iti 1,400 nga indibidual ti nagnumar iti libre nga RT-PCR test manipud kadagiti napuntirya a sektor kabayatan ti aktibidad.
Kinunana a 520 wenno 36.8% kadagiti nasao nga indibidual ti nagpositibo iti COVID-19 bayat a 461 wenno 32.6% ti residente ti Baguio.
Naisayangkat ti aggressive community testing tapnu mapatibker pay ti testing capability ti Baguio kas maysa nga addang tapnu maaksionan ti agdama a panagngato ti kaso ti COVID-19 a mapapati nga ituntunda ti baro nga Omicron variant.
Immunan a kinuna ti mayor a babaen iti COVID testing ket maduktalan ti pagtataudan dagiti impeksion ken dagus a maipasidong iti isolation dagiti agpospositibo tapnu malapdan ti ad-adda a panagwaras ti virus.
