BAGUIO CITY – Saan a napintas ken saan a naurnos ti umuna nga aldaw a panakaisayangkat ti ‘No Swab Result, No Entry’ Policy iti La Trinidad Vegetable Trading Post.
Obserbasyon daytoy ni Agot Balanoy, panakabagi ti liga dagiti asosasyon iti nasao a trading post nga imbinglayna iti panakiyuman ti Bombo Radyo Baguio kenkuana.
Inlawlawagna a daytoy ket gaputa adu dagiti traders, packers, porters ken truckers a saan a nakauneg iti nasao a trading post gapu iti kaawan ti swab test result a naiparangda kadagiti nakabantay iti sumrekan iti La Trinidad Vegetable Trading Post.
Dinakamatna a dagiti laeng mannalon ti napalubusan nga umuneg sadiay a nagresulta iti kinakurang dagiti buyers dagiti nateng.
Kinunana a gapu iti daytoy ket adu a mannalon ti immakar kadagiti pribado a trading areas ken iti Benguet Agri-Pinoy Trading Center tapnu saan a madadael ken mailako a dagus dagiti nateng dagitoy.
Sinuspindir metlaeng ni Mayor Romeo Salda ti nasao a polisiya gapu iti nagduduma a pammabalaw ken arungaing dagiti stakeholders.
Nasuspindir pay ti mandatory swab testing kadagiti packers, traders ken disposers sadiay La Trinidad a manamnama kuma a malpas ita a lawas.
Nupay kasta, inyunay-unay ni Balanoy a sisasagana latta dagiti stakeholders iti vegetable industry sadiay a maipasidong iti mass testing la ketdi adda dagiti masurot a mekanismo tapnu naannayas ti panakaisayangkat ti nasao a COVID-19 testing.
