BAGUIO CITY – Inkalintegan ni Councilor Benny Bomogao, dadaulo ti Committee on Public Utilities, Transportation, and Traffic Legislation ti singasing a P7-B monorail project iti Baguio City .
Iti interview ti Bombo Radyo Baguio, kinunana a napintas nga iyabrasa dagiti proyekto ken addang a mabalin a mangrisot iti parikot ti siudad.
Impeksana a nasken nga maadal nga umno dagitoy nga proyekto tapnu naanayas wenno dagus a maipatungpal.
Nupay kasta, kinunana a nalidem a maipatungpal iti kabiitan a panawen ti monorail project gaputa dakkel unay ken awan ti dakkel a pondo ti siudad para iti nasao a proyekto.
Agtalek daytoy a maipatungpal laeng ti nasao nga proyekto nu adda dagiti agpuhanan wenno aginvest iti siudad tapnu maipatungpal daytoy.
Inyunay-unayna nga panawen laeng ti makaibaga nu mabaelan ti siudad a maaramid dagitoy nga proyekto ngem saan met a madi nu agarapaap para iti masungad a pagsayaatan ti langa ti trapiko iti Baguio City.
Maipalagip nga inaprubaranen ti Cordillera Regional Development Council Cordillera ti resolusyon a mangbukbukel ti ad hoc committee a mangamong iti maikalkalikagum a full-blown feasibility study para iti monorail project.
Iti pre-feasibility study a naipatungpal, dumanon iti 5.2 kilometers ti kaatiddog ti monorail a maimuntar iti syudad nga aggatad iti 4 billion bayat a 2.1-kilometer ti monorail a maimuntar iti La Trinidad a mapondoan iti P3 billion
Inmunan nga inlawlawag ti lokal a gobierno ti syudad a ti nasao a monorail wenno ti singasing nga Automated Guideway Transit (AGT) system ket maikarga iti Baguio City ken La Trinidad, Benguet.
