BAGUIO CITY – Temporaryo a naisardeng ti pannakaipatungpal ti risk-based mass testing iti COVID 19 ditoy siudad ti Baguio.
Sigun ken ni Assistant city health services officer Dr. Celia Flor Brillantes, daytoy ket gapu iti kinakurang dagiti test kits a maaramat.
Kinunana a nagkari ti Department of Health a mangipaay iti 140,000 test kits para iti risk-based mass testing ditoy siudad.
Nupay kasta, kinunana a 100 a test kits pay laeng ti naawat ti siudad gapu iti parikot iti delivery kadagiti nasao a kagawaan.
Kinunana nga idi kalman ket nakaipatungpal ti Baguio General Hospital and Medical Center iti 10 a risk-based test ken dumanonen iti pakabuklan a 2,299 a PCR test ti naipatungpal iti siudad.
Iti baet ti pannakaisardeng ti risk based mass testing ditoy siudad, kinunana ni Brillantes nga agtultuloy met ti Rapid testing diagnosis.
Kabayatanna, iti agdama ket ad-adalen pay dagiti opisial ti lokal a gobierno ti siudad no maituloy ti panggep a panaggatang iti 10,000 a PCR test kits gapu ta amangan no agbalin met laeng a parikot ti pannakaibiahe dagitoy.
