BAGUIO CITY – Matalantan iti sumaruno a taripnong ti Baguio-La Trinidad-Itogon-Sablan-Tuba-Tublay (BLISTT) Governing Board ti polisya ti lokal a gobyerno ti Baguio a maipawilen ti iseserrek dagiti inter-municipal public utility jeepneys (PUJs) iti central business district ti siudad.
Sigun kenni Mayor Benjamin Magalong, daytoy ket tapnu maka-ala iti kapanunutan manipud kadagiti mayor dagiti maseknan a munisipyo para iti panakakissay ti adu a lugan iti sentro ti siudad.
Dinakamatna a binagaannan dagiti mayor ti La Trinidad, Itogon, Sablan, Tuba ken Tublay seknan iti nasao a plano ti siudad.
Inkalinteganna a ti panakaipawil dagiti inter-municipal PUJs iti central business district ti Baguio ket maysa kadagiti wagas tapnu epektibo a marisut ti innaldaw a kumarkaro a parikut iti trapiko sadiay.
Innayonna a mabigbig dagiti residente ken dagiti sangaili ti dakkel a pagbaliwan ti taray iti trapiko iti kanito a matungpal ti nasao a polisiya.
Sign pay kenni Mayor Magalong, nasken a makikaykaysa dagiti inter-municipal PUJs iti implementasyon ti nasao a polisiya.
Maipalagip nga impatungpal ti lokal a gobyerno ti non-entry ditoy siudad dagiti PUJs ti La Trinidad ken nagpatinggada laeng sadiay Slaughterhouse Compound ngem nagresulta laeng daytoy iti ad-adda nga inconvenience kadagiti komyuter ti La Trinidad ken dagiti taga-Baguio nga agturong iti dadduma a lugar iti Benguet.
