BAGUIO CITY – Resrespetuen ti Malacañang ti desisyon ti lokal a gobyerno ti Sagada, Mountain Province a panangpaay iti kiddaw ti delegasyon ti Malacañang Presidential Broadcast Staff, pakairamanan ti film director a ni Joyce Bernal para iti panagalada ti videos iti nalatak a tourist spot kabayatan ti agdama a pandemya gapu iti COVID-19.
Inwaragawag daytoy ni Presidential Spokesperson Harry Roque kagiddan ti panangiyulitna a rinespeto ni Bernal ken ti delegasyon ti nasao a desisyon ti Office of the Sagada Mayor ken ti Sagada Municipal Disaster Risk and Management Office.
Innayonna nga addaan met ti delegasyon iti health certificates ken travel authorities.
Immunan nga inlawlawag ti lokal a gobyerno ti Sagada, Mountain Province a ti panangiwilda iti delegasyon manipud iti munisipyo ket paset ti nainget nga addangda tapnu mapagtalinaed a COIVD-19-free ti Sagada.
Inyunay-unayda a kas maysa a 5th-class municipality ket saan a nakasagana ti Sagada, nangruna dagiti health facilities daytoy a mangakomodar iti presensia dagiti positibo a kaso ti COVID-19 sadiay.
Kabayatanna, agingga ita ket naulimek ti kampo ni Direk Bernal mainaig iti insidente no sadino, naamuan a nagturong dagitoy sadiay Banaue, Ifugao kalpasan ti napasamak sadiay Sagada.
Nupay kasta, kas iti insidente sadiay Sagada ket kinadwaan ti pulisya ti Banaue dagitoy paruar iti probinsia ti Ifugao kas maitunos iti pammilin ni Banaue Mayor Dr. Wesley Dulawan no sadino, nailanad a mapawil ti panagpasyar sadiay manipud July 3-10.
Maibagbaga a nagturong ti grupo ditoy Baguio City ken dimmalanda iti triage ti Baguio General Hospital.
Iti agdama, saan paylaeng a nalawag no karaman da actor Piolo Pascual ken actress Bela Padilla iti puntirya a footage wenno video iti sumagmamano a tourist spot ditoy City of Pines a maiparang iti maikalima nga State of the Nation Address ni Presidente Rodrigo Duterte inton July 27.
