BAGUIO CITY – Makidkiddaw ti nainget a panakaipatungpal ti ordinansa ti siudad a mangipawpawil iti concrete mixing jobs ken cement batching stations kadagiti amin a kalsada ti Baguio.
Nailanad iti resolusyon a pinirmaan ti lokal a konseho ti siudad ti kiddawda para iti nasao nga addang ti regional office ken district offices ti Department of Public Works and Highways, City Engineering office ken ti Baguio City Police Office.
Impetteng ti resolusyon a nasken a dagiti mismo nasao nga opisina ti gobyerno ti mangpalagip kadagiti kontraktor iti panangsurot dagitoy iti nasao nga ordinansa tapno nasayud ti implementasyon dagiti proyekto kadagiti kalkalsada iti Baguio.
Manamnama pay a saanen nga agbalin nga obstruction dagiti concrete mixing jobs ken cement batching stations kadagiti motorista ken kadagiti tattao nga agur-uray iti lugan iti igid dagiti kalsada.
Nagbalin nga aksion daytoy ti konseho ti Baguio kalpasan nga impadanun kadakuada dagiti netizens ti reklamo seknan iti panakaipatungpal ti panagkiwar ti semento iti igid dagiti kalkalsada nga addaan ti manarimaan a patrabaho.
Patien ti konseho a kasapulan a mapalagilan manen dagiti amin a supervisors dagiti infrastructure projects seknan iti nasao nga ordinansa a nakailanadan ti probisyon a nasken nga adda ti bukod a cement batching stations ti kontraktor iti ruar ti siudad tapno saan dagitoy a makasali iti iyar-aramidda a kalsada.
