BAGUIO CITY – Pinalen ti desisyon ti City Health Services Office a saan a mabalin nga agluto iti night market sadiay Harrison Rd., Baguio City.
Kinuna ni Dr. Celia Flor Brillantes manipud iti nasao nga opisina nga adu ti linabsing dagiti food handlers nangruna iti sanitation malaksid nga awananda iti sanitary facilities sadiay kas kuma iti pagbugoan iti ima.
Iti panakiuman ti Bombo Radyo, kinunana a ti saan nga umno a food handling ket mangitunda iti food and water borne diseases.
Innayunna a narugit a talaga ti night market a mangipasimudaag met a narugit dagiti maiserserbi a taraon sadiay.
Inaklonna pay nga adu ti nagturong iti opisinada a nagreklamo gaputa adda dagiti dadduma a food vendors a mangirisrisiklo kadagiti styrofoams a pagikabkabilanda iti taraon.
Kinunana pay a ti night market ket para laeng kuma kadagiti dry goods ngem nabaybay-an isut gapuna nga immadu dagiti agilaklako iti taraon.
Linawlawaganna met a saan a maipawil ti panagilako iti taraon sadiay ngem nasken a dagiti packed foods laeng.
Iti agdama ket ad-adalenda ti panakaikabil ti warmer sadiay tapnu saan a mapukawan iti trabaho dagiti food vendors, malaksid pay a mangipaayda iti guidelines a suroten dagitoy.
