BAGUIO CITY – Ad-adalen ti Police Regional Office – Cordillera (PROCOR) ti panangipila iti kaso nga illegal trafficking of minors ken panaglabsing iti International Humanitarian Laws kontra kadagiti maatap a front organizations ditoy rehion Cordillera kasaruno ti isusuko dagiti tallo a rebelde a kameng ti New People’s Army (NPA).
Sigun kenni PBGen. R’Win Pagkalinawan, dadaulo ti PROCOR, aramatenda dagiti salaysay dagiti sigud a rebelde a nirekrut ti NPA iti baet a menor de edad paylaeng dagitoy.
Impettengna a gungundawayan dagiti nasao a front organizations dagiti agtutubo.
Kinunana a daytoy ti rason iti panangipilada ti kaso kontra kadagiti front organizations kas iti Cordillera People’s Alliance (CPA) gaputa dagitoy ti nangallukoy ken nangrekrut kadagiti nasao nga indibidual.
Impettengna a babaen iti panakaipila ti kaso kontra kadagiti front organizations ti NPA ket maisardeng ti pananggundaway ken panangallilaw dagitoy kadagiti agtutubo babaen iti panangidiayada iti libre nga edukasyon.
Dinakamat ni Pagkalinawan nga imbes nga edukasyon ket isuruan dagiti rebelde dagiti agtutubo no kasano a lumaban wenno makigubat, agiggem ti arms ken makiranget iti gobyerno.
Gapu iti daytoy, inyunay-unayna kadagiti agtutubo ditoy Cordillera ti saanda a panagpa-allilaw kadagiti front organizations ti NPA a mangrekrekrut kadagiti agtutubo.
Immunan nga insalaysay ti dua kadagiti tallo a kaudian a rebelde a simmuko a naallukoy dagitoy a makikappeng iti NPA babaen iti CPA idi adda dagitoy iti sekondarya ken kolehio.
