BAGUIO CITY–Panggep dagiti petitioners a mangipila iti Writ of Kalikasan kontra iti lokal a gobyerno ti Baguio mainaig pay laeng iti panaka-aramat ti paset ti Dairy Farm kas staging area dagiti basura ti siudad.
Maipalagip a dumanon iti 200 dagiti petitioners manipud Barangay Dontogan iti Baguio City ken Barangay Poblacion iti Tuba ken dadduma pay a maseknan nga indibidual.
Sigun iti sumagmamano kadagiti petitioners, arigna saan a dengdenggen ti siudad ti arungaingda isut gapuna nga ikonkonsiderada nga iyuman daytoy iti korte.
Dinakamatda nga inyunay-unayda iti naangay a sesyon ti Sangguniang Panlungsod ti siudad idi napalabas a lawas ti angot dagiti basura ken naariwawa a panakaiyakar dagiti basura kadagiti trak.
Nupay kasta, agingga ita ket ur-urayenda ti aksion ti siudad ti Baguio ken ti Department of Environment and Natural Resources iti nasao nga staging area.
