BAGUIO CITY – Maimuntaren ita nga umuna a bulan ti tawen 2021 dagiti bicycle lanes ditoy siudad ti Baguio.
Sigun kenni City Administrator Engineer Bonifacio Dela Peña, nakagatangen ti City Engineering Office iti pintura para iti panakaimuntar dagiti bicycle lanes ditoy siyudad, partikular iti Central Business District.
Kinunana nga uppat a ruta ti pakaimuntaran dagiti nasao a bicycle lanes, partikular ti Marcos Highway manipud Green Valley junction agginga iti BGHMC rotunda, ti Naguilian Road, ti Loakan Road manipud iti Barangay Scout Barrio agginga iti Luneta Hill sadiay Upper Session Road ken iti Pacdal rotunda agginga iti Session Road rotunda.
Inlawlawagna met a saan dagitoy a makaapektar iti manarimaan a road widening projects ditoy siudad malaksid a temporaryo paylaeng dagiti nasao a bicycle lanes, partikular iti deppaar ti Marcos Highway ken Naguilian Road.
