BAGUIO CITY – Inkalintegan ti ama ti Baguio ti panakairaman ti siudad kadagiti high risk areas ti COVID-19 iti pagilian a kas nailanad iti report ti UP OCTA Research Team.
Nailanad iti nasao a report a gapu daytoy iti ngumatngato a baro a kaso ti sakit a mailislista iti innaldaw ken iti nangato a critical care occupancy ditoy siudad.
Sigun kenni Mayor Benjamin Magalong, agtaltalinaed a kontrolado ti lokal a gobyerno ti Baguio ti sitwasyon iti COVID-19 ditoy siudad nangruna ta epektibo ken maisaysayangkat ti nagduduma a control systems.
Kinunana a nupay pudno nga adda ti outbreak ti COVID-19 ditoy Baguio idi napalabas a bulan, partikular kadagiti police trainees ken iti Slaughterhouse area, saan daytoy a nagresulta iti panagdanag ti siudad.
Inlawlawagna a daytoy ket gaputa nangato ti situational awareness ken umno ti panangimaton ti siudad iti sitwasyon nangruna ta nabigbig dagiti lokasyon ti outbreak.
Impannakkelna a nangato ti testing capacity ti siudad a dimmanon iti 16 percent ken agtultuloy ti napalawa wenno targeted testing.
Sigun pay iti Contact Tracing Czar ti pagilian, nangato a contact tracing efficiency ratio ti siudad ken kabaelan dagiti contact tracing teams ti siudad a mangsarak kadagiti dadduma a tattao a naimpeksion iti virus a kaipapanan ti panagngato dagiti kaso.
Innayonna nga umdas ti test kits ken agar-aramat ti siudad iti data analytical tools a mangduktal kadagiti kaso ti COVID-19 malaksid pay iti napintas a panakikaykaysa ti komunidad.
