BAGUIO CITY – Patien ni ACT-CIS partylist ken Benguet Caretaker Eric Go Yap nga adda maris pulitika ken black propaganda ti panakairaman ti naganna iti maatap a korapsion kadagiti proyekto ti DPWH.
Sigun kenkuana, resrespetuenna ti desisyon ni Pres. Duterte a nangibasa kadagiti nagan dagiti nairaman iti isyu kagiddan ti panangdayawna iti panangdakamat ti presidente nga awan ti ebidensia kontra kadagiti maak-akusaran a kongresista.
Kagiddan iti daytoy, kinaritna ni Commissioner Greco Belgica ti Presidential Anti-Corruption Commission iti panangiparang daytoy kadagiti ebidensia a mangpaneknek kadagiti insumitir daytoy a report keni Pres. Duterte.
Nainget metlaeng a pinaglibakanna ti alegasyon a panakibiangna iti bidding process ti DPWH nangruna ta idi nadutukan kas Caretake Congressman ti Benguet idi Enero ti agdama a tawen ket nalpasen dagiti bidding dagiti infrastracture projects para iti probinsia.
Patien pay ti kongresista a daytoy ket biktima ti nasapa a political demolition job nangruna ta adda ti agwarwaras a damag a tumaray daytoy kas kongresista ti Benguet.
Iti baet daytoy, inkarina nga ituloyna latta nga iwanwan dagiti infra projects iti Benguet tapnu malpas dagitoy ken saan a masayang ti kwarta dagiti tattao.
Impasiguradona pay a no maduktalan a guilty daytoy kadagiti pammabasol ket nakasagana daytoy nga agikkat kas chairman ti Appropriations Committee iti Kamara, kas panakabagi ti ACT-CIS partylist ken kas caretaker congressman ti Benguet.
