BAGUIO CITY – Impeksa dagiti cutflower growers iti Cordillera a dakkel ti epekto iti pammastrekkanda ti pammilin ti gobyerno a mairikep dagiti sumagmamano a sementeryo iti pagilian iti umadanin nga undas.
Iti interview ti Bombo Radyo, kinuna ni Andy Colte Sr., Cut Flower Officer, napintas ti apitda gaputa ado ti suplay ti sabong iti rehiyon ngem bassit paylaeng ti gumatang.
Dinakamatna a manarimaan ita ti panag-apitda ti sabong ken ibiyaheda dagitoy sadiay Dimasalang, Metro Manila gaputa ditoy ti kadawyan a paggatgatang dagiti buyers.
Sigun kenni Colte, nalaka paylaeng ti presyo dagiti sabong gaputa bassit paylaeng dagiti gumatgatang.
Dumandanon laeng ti presyo ti Chrysanthemum iti P120 tunggal dosena bayat nga agtaltalinaed ti P500 agingga P600 a presyo ti Anthurium.
Immuna metten a kinuna ni Colte nga 80% agingga 90% a suplay ti sabong iti pagilian partikular ti Anthurium ket agtataud iti Cordillera.
