BAGUIO CITY – Nakiddaw ti panangiyendorso ni Mayor Mauricio Domogan iti cease and desist order para iti pannakairikep dagiti nagduduma a negosyo iti uneg ti Maharlika Livelihood Complex ditoy sioudad ti Baguio.
Nailanad iti resolusyon ni Councilor Edgar Avila ti kiddaw a panakairikep dagiti sumagmamano a panganan, videoke bars ken billiard halls gapu iti panaglabsing dagitoy iti nagduduma nga ordinansa, pakairamanan ti Tax Ordinance ti siudad.
Kinunana nga adu kadagiti nasao a negosyo ken establishimiento ti naduktalanda nga agiserserbi iti arak kalpasan ti naituding a curfew.
Innayonna a binigbigen ti pulisya dagiti sumagmamano a paginuman iti nasao a pasdek a kadawyan a pakapaspasamakan dagiti kaso ti physical injuries wenno panagdangran.
Agtalek pay dagiti konsehal a babaen iti nasao nga addang ket mapukaw dagiti nagduduma nga insidente nga ituntunda dagiti nasao a negosyo.
