BAGUIO CITY – Nakiddaw ti panangiraman dagiti personnel ti Baguio City Police Office (BCPO) iti pakaseknan ti kinadalus ti aglawlaw bayat ti panagpatrolya dagitoy.
Nailanad daytoy iti Memorandum No. 724 nga impaulog ti mayor ti siudad para iti dadaulo ti BCPO a ni PCol. Glenn Lonogan.
Mabasa iti memorandum ti kiddaw ti mayor nga iraman dagiti agpatpatrolya a pulis kadagiti report dagitoy dagiti ladawan ken dagiti barangay a mangsaksakop kadagiti narugit a disso.
Karaman ditoy dagiti kalsada, sidewalks, waiting sheds ken dadduma a parapubliko a lugar a narugit, saan a nasimpa ken addaan ti obstruction.
Tarigagay ti mayor a babaen iti nasao nga addang ket marisut ti agtultuloy a kinarugit kadagiti kalsada, sidewalks ken dadduma a parapubliko a lugar iti siudad.
Kinunana nga iti agdama ket ad-adaptaren ti lokal a gobyerno ti agresibo nga addang tapnu madalusan ken mapapintas ti siudad kagiddan dagiti addang para iti panakaragpat ti baro a normal a panagbiag iti baet ti agdama a pandemya.
Manamnama a babaen iti suporta ti BCPO iti nasao a kampanya para iti kinadalus ket ad-adda a mapatibker daytoy tapnu ad-adu a lugar ti mawanawanan.
