BAGUIO CITY – Impetteng ti Philippine Drug Enforcement Agency (PDEA) a dimmalan iti nainget a beripikasyon ken imbestigasyon ti nagan dagiti personalidad iti kaudian a narcolist a nakairamanan ti 34 a barangay officials ti rehiyon Cordillera.
Iti panakiyuman ti Bombo Radyo kenni Atty. Joseph Frederick Calulot, panakangiwat ti PDEA-Cordillera, kinunana nga ur-urayenda laengen ti pammilin manipud iti PDEA-Central Office para iti panakaipila ti kaskenan a kaso kontra kadagiti nainaganan nga opisyal.
Nupay kasta, balbalakadanna dagiti karaman iti listaan tapnu makikoordinar dagitoy iti opisina ti PDEA tapnu madalusan ti nagan dagitoy sakbay ti panakaipila ti kaskenan a kaso.
Innayonna a manarimaan met ti panangberipikarda iti sabali pay a listaan dagiti dadduma nga opisyales ti gobyerno a karaman metlaeng iti illegal drug trade.
Nailanad iti kaudian a narco-list ti PDEA ti nagan dagiti 25 a barangay officials sadiay Abra, lima sadiay Apayao, dua iti siudad ti Baguio ken saggaysa iti probinsia ti Kalinga ken Ifugao.
Kabayatanna, inyunay-unay met ni PDEA spokesperson Derrick Carreon nga awan ti dadduma a panggep ti ahensiada ken ti Department of the Interior and Local Government iti panangiwaragawagda iti nagan dagiti opisyal dagiti barangay a karaman iti narco-list.
Iti panakipatang ti Bombo Radyo, impeksa ni Carreon a nagtungpal laeng ti dua nga ahensiya iti pammilin ni Presidente Rodrigo Duterte tapnu madalusan dagiti amin a barangay nga apektado iti iligal a droga.
Kinunana a kangrunaan a panggep ti presidente a maamuan dagiti botante no asino ti rumbeng a botosan dagitoy iti masungad nga eleksiyon ken tapnu maliklikan ti panakaipatugar manen dagiti opisial a nabigbig iti drug watch list.
Inlawlawagna pay a maipaayan latta iti gundaway dagiti nainaganan nga opisiyal a mangdalos iti nagan dagitoy babaen iti panangipaayda iti pammaneknek nga awan ti pakainaiganda iti iligal a droga.
Innayon ni Careon nga iti kanito makasuan dagiti nasao nga opisyal ket maipaay ti naganda iti Commission on Elections tapnu mangipaay met ti komisyon iti kaskenan nga aksiyon a maitunos iti linteg ti eleksion.
