BAGUIO CITY – Impannakkel ti National Economic and Development Authority (NEDA) – Cordillera a kabayatan ti pandemya idi napalabas a tawen ket ad-adda a nakaawat iti suporta manipud iti nagduduma a sektor ken iti national government ti maisaksakad nga otonomiya ti Cordillera Region.
Iti interview ti Bombo Radyo Baguio, kinuna ni NEDA-Cordillera OIC Regional Director Stephanie Christiansen nga adun dagiti personalidad iti Gabinete, Senado ken Kamara a mangsupsuportar iti Cordillera Autonomy.
Dinakamatna nga iti met rehion ket nasuroken iti 132 nga statement ken manifesto of support ti naawatda manipud kadagiti pangisaysayangkatanda ti information education campaign seknan iti nasao a ganwat ti rehion.
Innayonna a malaksid iti social media ket al-alaenda dagiti agtutubo ken dagiti Indigenous Peoples Mandatory Representative kas katulongan iti kampanya para iti panakailawlawag ken panakaipaka-awat ti kinapateg ti panagbalin ti Cordillera nga autonomous region.
Imbinglayna nga addan iti ima ti Kongreso ti gasat ti Cordillera Autonomy Bill bayat nga itultuloy met ti NEDA ti batangda para iti panakaisagana ti Cordillera ken dagiti umili daytoy para iti panagbalin ti rehion nga autonomous region.
Impeksa pay ni Christiansen ti panagtalekna a maragpat ti otonomiya ti Cordillera sakbay nga agleppas ti termino ni Presidente Rodrigo Duterte nangruna ta agtatrabaho met dagiti konresista ti rehion para iti nasao a panggep.
Maibasar iti plano, puntirya ti Regional Development Council ti Cordillera nga inton 2022 ket malpasen ti plebisito wenno panagbotos dagiti Cordillerans iti nasao a panggep.
