BAGUIO CITY – Agtungpal latta ti Philippine Drug Enforcement Agency (PDEA) iti aniaman a pammilin ni Presidente seknan iti naitengan a kampanya kontra iti iligal a droga tapnu naan-anay a madalusan ti pagilian manipud iti iligal a droga.
Iti panakiyuman ti Bombo Radyo kenni Atty. Joseph Frederick Calulut, panakangiwat ti PDEA-Cordillera, kinunana a kagiddan ti panagbitla ti presidente idi Lunes ket nangisayangkatda met iti operasyon sadiay Mt. Province a nakakemmegan dagiti uppat a turista a mangibiahe kuma iti 26 a kilo ti marijuana paturong sadiay lowlands manipud Kalinga.
Sigun kenkuana, ar-aramiden ti opisinada ti kampanya kontra iti iligal a droga gaputa agarup linawas ken binulan nga adda ti parparuten ken ur-uramen dagitoy a marijuana plants malaksid pay kadagiti buy-bust operation dagitoy.
Innayonna a tuttutukanda dagiti pagmulaan ti marijuana kadagiti kabambantayan ti rehiyon gaputa adu latta dagiti plantation sites ti maiparit a mula ken numero uno latta ti Cordillera a pagtataudan dagitoy.
Impannakkelna met a saan a nadara ti operasyonda kontra kadagiti drug pushers ken drug users gaputa resrespetuenda ti linteg ken ti biag dagiti adda iti illegal drug activities.
Nupay kasta, inaklon ni Atty. Calulut nga agtaltalinaed a karit iti PDEA-Cordillera ti kaawan dagiti makemkemmegda a marijuana cultivators kadagiti marebrebbek a marijuana plantation sites iti nagduduma a paset ti rehion.
Kinunana a manarimaan paylaeng ti panangbigbigda kadagiti cultivators kadagiti madaddadael a marijuana plantation sites.
Innayonna a nainget ti panangsukimatda kadagiti makemkemmeg a mangibibiahe kadagiti maiparit a mula tapnu maamuan no asino ti gimmatangan dagitoy.
Dinakamatna a public land ti kadawyan a pakaimulmulaan dagiti marijuana ken dakkel ti pammatida nga adda ti mangsupsuplay kadagiti agimulmula iti marijuana.
Innayon ti abogado nga agtultuloy ti dayalogoda kadagiti lokal a gobyerno ken kadagiti umili tapnu maipaka-ammo ken maipalagip kadagitoy ti dakes nga epekto ti iligal a droga, dagiti pannusa a sangwen dagiti agmulmula ti marijuana ken dadduma pay.
Naamuan kenkuana nga agingga ita ket adda latta dagiti pagmulaan ti marijuana kadagiti kabambantayan ti Kalinga, Benguet, Ifugao ken sumagmamano a paset iti ig-igid ti Mt. Province.
