BAGUIO CITY – Posible nga irekomendar ti Task Group on UK Variant ti panakaisubli ti quarantine status ti entero a Cordillera Region iti General Community Quarantine (GCQ) manipud iti agdama a Modified General Community Quarantine.
Inwaragawag daytoy ni DOH-Cordillera regional director Dr. Ruby Constantino kas resulta ti panakitaripnongda iti nasao a task group idi rabii.
Kinunana a no agtultuloy ti panagngato ti Health Care Utilization Rate ti Cordillera ket irekomendar ti task group ti nasao nga addang iti Inter-Agency Task Force.
Maibasar iti kaudian a datus ti ahensia, dandanin adda iti ‘danger zone’ ti Health Care Utilization Rate ti Cordillera, no sadino, kaaduan kadagiti pasilidad para kadagiti pasyente ti COVID-19 ket fully occupied wenno napumpunnon.
Nupay kasta, mangnamnama daytoy nga agbalin nga operational dagiti dadduma a pasilidad a mabalin a maaramat kas kanayonan nga isolation ken treatment facility iti rehion.
Sigun kenkuana, babaen iti daytoy ket saanen a maituloy ti plano a rekomendasyon.
Inyunay-unayna met laeng ti nainget a panakaimplementar dagiti minimum health care standards nangruna ta karaman kadagiti nailista a rason iti killaat a panagngato ti kaso ti COVID-19 ket ti panakaisayangkat dagiti panagu-urnong ken dagiti cultural practices wenno ritual.
