BAGUIO CITY – Nagkaykaysa dagiti biktima ti Baguio City-based Satarah Wellness Marketing iti nagbalin a reaksionda iti damag a panakaipaulog ti freeze order kadagiti bank accounts ken properties ti nasao a ponzi investment firm gapu iti maatap a money laundering.
Sigun kadagiti biktima, agingga ita ket mangnamnamada a maisubli ti kwartada nga impuonanda iti nasao a kompanya.
Impettengda a ti kwarta nga impuonanda iti Satarah ket pinagrigatanda ken sumagmamano kadagitoy ti nalumlum iti utang.
Kinuna dagiti dadduma a biktima a no mabalin ket saan a mai-freeze dagiti nasao a bank accounts ti kompanya ken imbes ketdi ket maiyakar laengen ti kwarta kadagiti biktima.
Saksakupen ti freeze order dagiti bank accounts ti 31 a tattao nga idadauluan ni Romyllie Batolne Lau a maibagbaga nga incorporator ti Satarah nga immunan a nakemmeg idi 2016 gapu iti kaso a syndicated estafa.
Maibagbaga a dumanon iti bilyon a pisos ti naurnong ti Satarah manipud kadagiti nagbalin a biktimada, pakairamanan ti nasurok sangagasut a milyon a pisos manipud iti maysa a rural bank ditoy rehion Cordillera.
