BAGUIO CITY – Impanamnama ni City Administrator Engineer Bonifacio Dela Peña a mailukat ti Igorot Stone Kingdom, maysa kadagiti nalatak a pagpasyaran iti Baguio City, apaman a kompletoen ken isumitir ti agtagikua dagiti kaskenan a dokumento.
Sigun kenni Engr. Dela Peña, nag-aplikaren ti management ti Igorot Stone Kingdom ti land titling iti Department of Environment and Natural Resources (DENR).
Nupay kasta, adda pailaeng dagiti kanayonan a dokumento a nasken a maisumiter iti City Building and Architecture Office ken iti City Planning and Development Officer.
Malaksid iti daytoy, nasken pay a masukimat dagiti nakabati a batbato tapno maipanamnama ti kinatalgedna kadagiti turista nangruna iti panawen ti didigra wenno kalamidad.
Impetteng ni Dela Peña a nu malpasan amin dagiti nasken a maisimpa ket ipaayanda ti agtagikua ti probationary building permit tapno agsubli manen ti operasyon.
