BAGUIO CITY – Binaliwan ni Mayor Benjamin Magalong ti probisyon ti immunan nga impaulogna a pammilin seknan iti panakaisubli ti liquor ban ditoy siudad ti Baguio.
Maipalagip nga indeklara ti mayor idi kalman ti temporaryo manen a liquor ban ditoy lokalidad kalpasan a naduktalan a maysa kadagiti rason iti panagkaro manen ti kaso ti COVID-19 sadiay Slaughterhouse area ken iti Ferdinand barangay ket ti saan a nakontrol a panagin-inom iti arak dagiti residente.
Nupay kasta, nailanad iti pinirmaanna a Memorandum No. 337 series of 2020 a saanen a maisubli ti liquor ban ngem ketdi rumbeng nga ingetan dagiti maseknan nga ahensia ti gobierno ken opisyales ti babbarangay ti panakai-regulate iti paginom ken panagilako kadagiti arak.
Inlawlawag ni Mayor Magalong nga inkonsiderada iti nasao a dessiyon ti epekto iti ekonomiya ti siudad no maituloy a mapawilan dagiti establishimiento nga agilako kadagiti produkto ti arak.
