Imbilin ni President Ferdinand Marcos Jr. kadagiti miembro iti Gabinete a mangisumitirda iti reportda biweekly wenno tunggal dua a lawas maipapan kadagiti nagdur-asan dagiti ipatpatungpalda a proyekto imprastraktura.
Sigun kenni Palace Press Officer Undercesretary Claire Castro, kayat ni President Marcos Jr. a saan laeng nga umab-abante dagiti proyekto nu di ket nasayaat metlaeng dagitoy a maar-aramid.
Daytoy ket kasaruno ti naobserbaran a panagkapoy iti nagdur-asan ti ekonomiya iti Pilipinas kalpasan ti 14 a tawen.
Sigun met kenni Economic Planning Secretary Arsenio Balisacan, dakkel a nakaapektar iti kasasaaad ti ekonomiya ken dagiti business ken consumer confidence ti kontrobersya kadagiti naanomalyaan a proyekto iti gobyerno.
Kabayatanna,impetteng ni Atty. Castro a nagballaag ti presidente kadagiti maduktalan a mangisumitir iti peke wenno saan nga umno a report ngem iti agdama ket manarimaan paylaeng ti panakapinal dagiti listaan ti pannusa a maipataw kadagiti opisyales nga aglabsing.
