BAGUIO CITY – Impalubusen ti Bontoc Municipal Inter-Agency Task Force (MIATF) ti panakaituloy ti operasyon dagiti provincial buses nga agbibiahe manipud Bontoc paturong iti ruar ti Mountain Province.
Nupay kasta, inyunay-unay ti Municipal IATF a nasken a maitunos ti operasyon dagiti provincial buses iti nainget nga implementasyon ti health protocols ken pagalagadan ti Land Transportation Franchising and Regulatory Board (LTFRB).
Sigun kenni Mayor Franklin Odsey, duan a provincial bus companies ti nangipeksa iti intensionda a mangituloy iti operasyonda.
Dinakamatna a dagitoy ket ti D’Rising Sun Transport System nga agbibiahe iti ruta a Bontoc-Baguio ken ti CODA Lines Corporation nga agbibiahe iti ruta a Bontoc-Cubao.
Dinakamatna a nakikoordinardan iti LTFRB-Cordillera para iti panakaiyendorso dagiti nasao a provincial bus companies tapnu maipaayanda ti pammalubos a mangituloy iti operasyonda.
