BAGUIO CITY – Iyapela dagiti amin nga small scale miners iti Benguet ti pammilin ni Environment Secretary Roy Cimatu a mangiparikep iti amin nga small scale mines iti entero a munisipyo ti Itogon mangrugi inton October 1.
Sigun kenni Itogon Mayor Victorio Palangdan, daytoy ti napagnuman dagitoy iti panagtaripnong dagiti amin a maseknan nga ahensia ken umili idi kalman.
Kinunana a kiddawenda a no mabalin ket saan a maipasardeng ti panagminas dagiti small scale miners kadagiti disso iti masakupan ti munisipyo a saan met a napeggad.
Dinakamatna met a napagnumuan dagiti masekan a maipasardeng dagiti napeggad a pagminasan kas iti Sitio Firstgate.
Innayon pay ti mayor nga adu dagiti disso a mabalin a pagminasan paylaeng sadiay Itogon.
Maipalagip nga addan ti naipaulog a Mine Site Closure Procedure ti Oplan “Itogon” ti National Task Force – Mining Challenge a nakailanadan dagiti aramidenda a panangiparikep kadagiti amin a pagminasan iti entero a munisipyo.
