BAGUIO CITY – Agtultuloy ti panangiwanwan dagiti maseknan nga opisina ti gobyerno ditoy Baguio kadagiti iligal nga istruktura a naibangon iti masakupan dagiti water ways ti siudad.
Naduktalan iti kaudian nga inspection kadagiti water ways ditoy siudad a 613 nga iligal nga istruktura ti naibangon iti masakupan ti three-meter easement dagiti Sagudin tributaries ti Balili River ken awanan dagitoy iti building permits.
Masarakan dagiti nasao nga iligal nga istruktura kadagiti barangay ti Happy Homes, North Sanitary Camp, Camdas, Trancoville, Alfonso Tabora, Magsaysay Private Road, ABCR, New Lucban, Brookside, Honeymoon Holy Ghost, Holy Ghost Extension, Imelda Village, Pacdal, Gibraltar, Saint Joseph Village, Brookspoint, East Modernsite ken Manuel Roxas.
Maibasar iti inspeksion, dagitoy nga iligal nga istruktura ket pribado a pagtaengan, pagpa-abangan, pagnegosyo-an, greenhouses, bodega, kongkreto nga alad, kallapaw, paglinungan, comfor rooms, simbaan, pribado a bangko, pagadalan, morge, pagtagilakuan, barangay halls, tangke ti danum, pagbaboyan, pagmulaan, septic tanks ken extension ti kontruksion.
Naipaayan metten iti sag-dua a notices of violation dagiti nabigbig nga agtagikua kadagiti nasao nga istruktura gapu iti panaglabsingda iti sumagmamano a seksion ti Environmental Code of Baguio City ken ti National Building Code.
Maipasidong iti hearing dagiti nasao a panaglabsing ken dagiti titled properties ken addaan aplikasyon sadiay DENR ket maidalan iti relocation surveys ken maaramid amin ti remedyo kadagiti awanan dokumento nga istruktura.
