Baguio City-Nainget a banbantayan ti Department of Social Welfare and Development ti relief operation kadagiti naapektaran iti Super Typhoon Egay.
Iti exclusive nga interview ti Bombo radyo kenni Department of Social Welfare and Development Regional Director Leo Quintilla kinunana a dumanonen iti nasurok 20,000 a foodpacks ti naiwaras kadagiti naapektaran iti bagyo iti rehiyon.
Kinuna pay ni Quintilla a madama ti panagsangpet dagiti reports manipud kadagiti nagduduma local government iti rehion.
Innayon na pay a madama ti validationda para iti kanayunan a request a 40,000 a family food packs manipud iti central office para iti nagduduma a local government units.
Kabayatanna, nakasangpet metten ti kanayunan a 10,000 a food packs manipud iti central office para kadagiti apektado nga indibidual idiay Apayao.
Sigun pay kenni Regional Director Quintilla, nakadanon idiay Abra ti 25,000 a kanayunan a family food packs para kadagiti naapektaran a pamilya.
Kabayatanna, kinuna na pay nga agarup iti 25,000 nga indibidual a nagbakwit ti nakasubli kadagiti pagtaenganda.
Inlawlawagna a malaksid iti Super Typhoon Egay maysa pay ti Habagat iti nangitunda iti napigsa a panagtudo a rason met iti nakaro a panaglayos idiay Apayao, Kalinga ken Abra.
Nangipaay metten ti Department of Social Welfare and Development Cordillera iti cash assistance kadagiti 2,0000 nga Individuals in Crisis Situation iti Baguio City.
Iti nasao a pay-out ti cash assistance kadua ti DSWD-CAR da House speaker Martin Romualdez, Congressman Eric Go Yap ken Congressman Mark Go.
Imbinglay pay ni Regional Director Quintilla, a problema ti pannakaiwaras ti food packs gapu iti kurang a bilang ti raw materials ken ti supply.
Nupay kasta, agyamyaman met daytoy kadagiti tumultulong nangruna iti repacking ken pannakaiwaras dagiti relief items nangruna kadagiti isolated a komunidad iti rehiyon.
Imbinglay pay ni DSWD-CAR Regional Quintilla ti nabaligi ti pre-positioning iti food packs kadagiti regional warehouses.
