BAGUIO CITY – Narugianen ti panakaiwaras ti Gamaleya Sputnik V COVID-19 vaccine nga inmunan a naawat ti Baguio City.
Sigun kenni Mayor Benjamin Magalong, naipatungpal ti maysa a taripnong idi kalman para iti panagsagana dagiti health workers a mangimaton iti panakaiwaras ti nasao a bakuna.
Maipalagip a naawat ti Baguio City Health Services Office ti 300 doses ti Russian-made a bakuna idi kalman.
Inlawlawagna a maysa a rason no apay a naipaayan ti Baguio iti Sputnik V vaccine ket ti kaadda ti bukod nga ultra cold storage facility ti syudad a a mabalin a mai-adjust tapnu maragpat ti temperatura a kasapulan ti nasao a bakuna.
Dinakamat pay ni Mayor Magalong nga adda ti kanayonan a 10,080 doses ti Sputnik V vaccine a ginatang ti lokal a gobierno ti Baguio a manamna a sumangpet ita a bulan.