BAGUIO CITY – Nangipatungpal iti prayer vigil dagiti opisial ken empleyado ti Benguet Electric Cooperative (BENECO) kas panangipakitada iti suportada kenni Engr. Melchor Licoben, ti agdama nga officer-in-charge ti kooperatiba.
Kasaruno daytoy ti saanna a panakairaman kadagiti pagpilian ti Board of Directors (BOD) ti BENECO nga agbalin a General Manager (GM) ti kooperatiba kalpasan nga inyendorso ti National Electrification Administration-Board of Administrators (NEA-BOA) ni Presidential Communications Operations Office (PCOO) Assistant Secretary Atty. Ana Marie Rafael-Banaag kas sumaruno a mangidaulo iti nasao a kooperatiba.
Iti eksklusibo a panakiuman ti Bombo Radyo Baguio, kinuna ni Jefferd Monang, presidente ti BENECO Employees Labor Union a malaksid iti prayer vigil ket al-allukuyenda ti panakimaymaysa ti publiko nangruna dagiti member-consumers tapno ilabanda ti patienda a pudno a proseso tapno maipatugaw iti akem ti maikari a mangidaulo iti kooperatiba.
Dinakamatna a nakaro ti panakadismayada iti nagbalin a desision ti NEA-BOA gaputa saan nasurot ti umno a proseso iti panakaipatugaw ti General Manager ti BENECO ken saanda a ninamnama ti panakaiyendorso ni Asec. Banaag iti nasao a posisyon.
Inlawlawagna a nagserbi ni Engr. Licoben kas Assistant GM ti kooperatiba agingga a nagbalin nga Acting GM iti bileg ti resolusyon nga impasa ti kooperatiba ken inaprubaran met ti NEA agingga a naipasa ti sabali manen a resolusyon para iti panagbalin ni Engr. Licoben nga officer-in-charge sadiay.
Nupay kasta, saan daytoy nga inaksionan ti NEA ngem ketdi nangipaulogda iti pammilin a mailukat ti aplikasion para iti posisyon a GM ti kooperatiba ken ditoy a nangipasa iti aplikasion ni Asec. Banaag a tubo ti Mountain Province bayat a kiniddawda ti pangaplikar ni Engr. Licoben a tubo met ti Benguet.
Kinuna pay ni Monang a naawatda idi agsapa kalman ti resolusyon nga impaulog ti NEA-BOA a nakailanadan ti desision a ni Atty. Banaag ti napilida nga iyendorso iti BOD ti BENECO.
Dinakamatna a naklaatda ken kinuwestionaranda ti pagrukodan ti NEA no sadino, kinunada a nagbasar laeng ti NEA-BOA iti interview dagiti dua nga aplikante.
Kukwestionaranda pay no kas-ano a nakwalipikar ni Asec. Banaag iti kina-GM idinto a kinunana a saan a maiyannatop kadagiti maikalkalikagum a kwalipikasion dagiti kapadasan ti opisyal.
Malaksid iti daytoy, kinunana nga awan ti nasayod a koordinasyon ti NEA kadagiti opisial ti kooperatiba.
Kitkitaenda pay no apay a ni Asec. Banaag laeng ti naiyendorso iti BOD ti BENECO idinto a duada kenni Engr. Licoben a nakapasa iti panagrepaso ti NEA-BOA.
Linawlawagan met ni Monang a saada a babbabalawen wenno kweskwestionaran a mismo ni Asec. Banaag ngem ketdi, ti proseso nga impatungpal wenno sinurot ti NEA iti panagpili dagitoy.
Nupay kasta, mangnamnama latta dagiti opisyal ken empleyado ti BENECO nga agtalinaed iti pwesto Engr. Licoben kas dadaulo ti kooperatiba iti baet a saan a daytoy ti inyendorso ti NEA-BOA nga agtugaw iti nasao a posisyon.
Kinuna ni Monang a ti latta BOD ti BENECO ti pinal nga agdesisyon no maipatugaw kas GM ni Asec. Banaag.
Dinakamatna a ti laeng akem ti NEA-BOA ket ti mangiyendorso kadagiti aplikante.
Gapu iti daytoy, posible a saan a maipatugaw iti pwesto ni Asec. Banaag no saan nga aprubaran ti BOD ti BENECO ti panakaiyendorso daytoy.
Iti panagbitla ni Monang iti naangay a prayer vigil dagitoy, dinakamatna a dakkel ti epektona iti operasion ti kooperaitiba ti kaawan ni Engr. Licoben.
Sigun kenkuana, marigatanda no masuktan ti nasao nga opisyal kalpasan ti agarop 30 a tawen a panagserbi daytoy iti kooperatiba a nangrugi kas on-the-job trainee agingga a nagbalin a lineman ken opisyal ti BENECO.
Impettengna pay a saan nga umno ti desisyon ti NEA a killaat a panagilukat iti aplikasion iti kina-GM ti BENECO idinto a mapaspasaran ti agdama a pandemya gapu iti COVID-19.
Kabayatanna, al-alaen met ti Bombo Radyo Baguio ti benneg ti NEA iti nasao nga isyu.
