BAGUIO CITY – Posible a mailaylayon ti pannakakanselar ti klase dagiti pagadalan a naapektaran iti panagriribok dagiti kameng ti New People’s Army (NPA) sadiay Malibcong, Abra itay laeng nabiit.
Sigun kenni Georaloy Palao-ay, pannakangiwat ti Deparment of Education (DepEd) – Cordillera, dumanon iti 11 a pagadalan ti naapektaran iti nasao nga insidente.
Nupay kasta, kinunana nga iti agdama ket kontrolado metten dagiti otoridad ti sitwasion iti nasao a munisipio.
Inlawlawagna a ti pannakakanselar ti klase dagiti ubbing ket paset ti panagannad ken panagridam dagitoy kabayatan ti clearing operations dagiti otoridad.
Kinunana pay nga inrekomendar ti pulisya ti pannakasuspinder ti klase sadiay Malibcong nangruna ta ti dadduma kadagiti mannursuro sadiay ket agtaud pay iti addayo a lugar.
