Bwineltaan ti kampo ni sigud nga Ako Bicol Party-list Representative Elizaldy “Zaldy” Co dagiti nangkumpiskar kadagiti nginginain a lugan daytoy.
Patien ti abogado ni Co a ni Atty. Ruy Alberto Rondain nga iligal ti panangkumpiskar dagiti otoridad iti nadakamat a sanikua ti sigud a manmanday-linteg nangruna ket maatap nga awan ti naipakita dagitoy a ligal a dokumento para iti panakaipatungpal ti nasao nga operasyon.
Sigun kenni Atty. Rondain, kinumpiskar dagiti otoridad dagiti lugan iti baet nga awan ti naipakitada a search warrant rason nga impettengna a saan a mabalin a maikalintegan ti inladawanna nga iligal nga operasyon babaen iti subsequent warrant of seizure
Innayon ti abogado a binutbuteng ken in-detain pay dagiti otoridad ti driver ni Co iti las-ud iti nasurok 12 nga oras.
Gapu iti dayta, kinuna ni Atty. Rondain a mangipilada iti kaso kontra kadagiti indibidwal nga adda ti pakainaiganna iti nasao nga operasyon.
Maipalagip nga idi laeng Huwebes, inturong dagiti kameng iti PNP, BOC ken Southern Police District dagiti 12 a nginginain a lugan ni Co iti compound iti ndependent Commission for Infrastructure (ICI).
