BAGUIO CITY – Pagparparikutan ita ti probinsia ti Aba no kasano a makwalipikar iti Seal of Good Local Governance Award dagiti sumagmamano a munisipyo sadiay a nakailistaan iti presensia dagiti narco-politicians.
Sigun kenni Governor Maria Jocelyn Bernos, gapu iti kaadda dagiti maibagbaga a narco-politicians kadagiti nasao a munisipyo sadiay ket posible a saandan a makwalipikar iti nasao a pammadayaw.
Kinunana a gapu iti daytoy ket kidkiddawenda iti Philippine Drug Enforcement Agency ken iti Department of the Interior and Local Government ti panagpatangda tapnu adalen ken kitaenda no anya dagiti mabalin a remedy nga aramidenda kadagiti pagalagadan dagitoy.
Sigun kenkuana, babaen iti daytoy ket maaddaanda latta iti gundaway a makapaset iti Search for the Seal of Good Local Governance Awardees ken makasurotda kadagiti pagalagadan nga itudtuding ti linteg.
Impettengna pay nga ar-aramidenda ti amin a kabaelanda tapnu magun-odda ti nasao a pammadayaw a maipapaay kadagiti lokal a gobyerno.
Innayonna a disididoda a mangsuportar iti anti-illegal drug campaign ti Duterte Administration kasaruno ti panangkaduana kadagiti 14 a nangabak a barangay officials manipud Abra idi nagparang dagitoy kadagiti opisyal ti Cordillera PNP.
