BAGUIO CITY – Nagserbi nga ‘eye-opener’ kenni Baguio City Mayor Benjamin Magalong ti napasamak a panakalabsing ti paglintegan iti social distancing kagiddan ti panakapasilaw ti Christmas Tree ti siudad sadiay Upper Session Road idi rabii.
Inaklonna daytoy iti eksklusibo nga interview ti Bombo Radyo Baguio kagiddan ti panangkunana a kasapulan ti contingency plan para iti kadaksan a sitwasyon.
Nupay kasta, inapresiarna dagiti dimmar-ay iti aktibidad nangruna ta agarup 90 percent ket nakasuot iti fac shield malaksid iti face mask dagitoy.
Innayonna nga uray adda dagiti nagtungpal iti physical distancing ket adda met dagiti naglabsing iti daytoy iti baet ti kanayon a panakaiyulit-ulit ti panagtungpal dagitoy iti physical distancing.
Immunan nga inwaragawagna idi rabii a daytoy ti mangibaklay iti pakabuklan ti responsibilidad iti napasamak ken amin a selebrasyon ti siudad para iti Paskua ket maitunos kadagiti naituding a safety protocols kontra iti COVID-19.
