BAGUIO CITY – Tarigagay dagiti opisial ti lokal a gobierno ti Baguio a maipasidong iti regulasion ti panagaramat iti paper bag ditoy siudad.
Iti interview ti Bombo Radyo kenni Councilor Mylene Yaranon, kasaruno daytoy ti panakaipawil ti panagaramat iti plastik ditoy siudad.
Inlawlawagna a kalpasan a naipawil ti panagaramat iti plastik ket nagbalin nga alternatibo ti paper bag a pagikabilan kadagiti tagilako.
Nupay kasta, kinunana a nakaawat ti City Council iti mensahe manipud kadagiti maseknan nga indibidual a mangkidkiddaw iti pannakalimitar ti pannakaaramat dagiti paper bag gapu ta ti papel ket maar-aramid manipud iti kayo.
Sigun iti konsehal, no adu ti maar-aramat a papel ket adu met ti masapul a mapukan a kayo.
Innayonna pay nga iti agdama ket maipaspasidongen iti umuna a panagbasa ti nasao a singasing nga ordinansa.