BAGUIO CITY – Saanen a matuloy ti imbilin ti Philippine Ports Authority (PPA) a pannakalimitar ti volume dagiti nateng nga agtataud ditoy lokalidad a maiturong iti dadduma a paset ti Pilipinas.
Iti interview ti Bombo Radyo Baguio kenni Agot Balanoy, panakangiwat ti liga dagiti asosasyon iti La Trinidad Vegetable Trading Post, kinunana a daytoy ket kalpasan a nakipatang dagiti mannalon, traders ken dadduma pay a maseknan nga indibidual iti PPA.
Kinunana a nailawlawag iti PPA a no maipatungpal ti panggep a load limit ket dakkel ti agbalin nga epekto daytoy iti industria ti nateng ditoy lokalidad.
Dinakamat pay ni Balanoy nga awan ti natibker a palawag ti PPA no apay a naibilin ti nasao a load limit.
Maipalagip nga inbilin ti PPA a mapagbalin laengen a 10 aginggat 11 a tonelada ti laonen dagiti vegetables trucks nga agtataud ditoy lokalidad manipud iti sigud a 22 a tonelada.