Agtultuloy ti panangipatpatungpal dagiti maseknan nga opisina iti panagmonitor kadagiti presyo ti bagas iti Baguio City Public Market.
Sigun kenni John Paul Peralta, spokesperson ti rice section ti Baguio City Public Market, imbinglayna nga agrikrikos iti merkado dagiti kameng iti Department of Agriculture (DA), city hall ken dagiti kameng ti daduma pay nga opisina kas iti Public Order and Safety Divisio(POSD).
Sigun kenni Peralta, malaksid nga imonmonitor dagiti otoridad ti presyo dagiti bagas ket adda dagiti gundaway a mangal-ala dagitoy iti sample tapno kitaenda ti kalidad dagiti bagas.
Innayon ni Peralta a makikokoordinarda a naimbag kadagiti maseknan nga opisina para iti presyo ti lakoda.
Maipalagip nga iti ngudo ti napan bulan ket nangrugi ti tension idiay Middle East a nangapektar iti suplay ken presyo dagiti produkto a petrolyo nu sadino, agingga iti agdama ket agtultuloy ti panagngato daytoy.
Gapu iti dayta, maap-apektaran metlaeng ti presyo dagiti daduma pay a commodity kas iti bagas nangruna ket agang-angkat metlaeng ti Pilipinas iti daytoy.
Nupay kasta, sigun kenni Peralta, arigna a mas stable pay ti presyo ti bagas a mailaklako iti Baguio City nu idilig iti presyo dagitoy idiay Metro Manila nga as-asideg iti bagsakan dagiti maang-angkat.//Bombo Rob Dominguez
