--Ads--
BAGUIO CITY – Kidkidawen ti Benguet General Hospital iti Department of Health a nayonanda ti alokasyon dagiti bakuna a maipaay iti probinsiya.
Sigun kenni BeGH Acting Chief Dr. Meliarazon Dulay, ngimmato ti bilang dagiti indibidual nga agtarigagay a mabakunaan kontra COVID-19.
Impannakelna a naaramaten dagiti 4,300 doses ti bakuna a naudi a naipaay iti probinsiya no sadinno maur-uray laengen dagiti kanayonan a suplay ti bakuna nga ipaay ti nasyonal a gobyerno.
Gapu iti daytoy, guyguyogoyenna dagiti umili ti Benguet nga agpalista iti masterlisting tapno manayonan ti suplay ti bakuna a maipaay iti probinsiya.
Dumanonen iti 40,000 nga indibidual ti nairekord iti masterlisting ken manamnama a manayonan pay daytoy iti sumarsaruno nga aldaw.
